“ပေါင်တံလေးတွေသွယ်လျအောင်လုပ်နိုင်မယ့် အရိုးရှင်းဆုံးနည်းလမ်းများ”

0
4865

မိန်းကလေးတွေရဲ့ ပေါင်တံတွေက တုတ်နေရင် ကြည့်လို့မကောင်းပါ။ ကိုယ်အလေးချိန်များလို့ ဝလာရင် ပေါင်တံတွေလည်း တုတ်လာတယ်။ တုတ်တဲ့ပေါင်တံတွေဟာ ကိုယ်အလေးချိန်ကို ထိန်းတဲ့နေရာမှာ အကြီးဆုံးစိန်ခေါ်မှု တစ်ရပ်ဖြစ်တယ်။ အထူးသဖြင့် တင်ပါး၊ ခါးနဲ့ ပေါင်တံတွေမှာရှိတဲ့ အဆီကိုချဖို့ဟာ ခက်ခဲကြောင်း ဘာလင်တန်ရှိ University of Vermont မှ ကိုယ်လက်လှုပ်ရှား လေ့ကျင့်ခန်းဆိုင်ရာ ဇီဝကမ္မဗေဒပညာရှင် ဒေါက်ကလပ်စ်အယ်လ်ဘေလာက ဆိုတယ်။ ခန္ဓာကိုယ်အောက်ပိုင်းရှိအဆီဟာ အဆီဆဲလ်တွေကို ဝင်/ထွက်ရာ၌ ခန္ဓာကိုယ်ရဲ့ အခြားအစိတ်အပိုင်းတွေ ရှိ အဆီတွေလောက် လွယ်လွယ်ကူကူ မရွေ့လျားပါ။ ပိုသွယ်လျတဲ့ ပေါင်တံတွေကိုရဖို့ သိပ်မလွယ်ပါ။ ဒါပေမယ့် မဟာဗျူဟာက ရိုးစင်းပါတယ်။ ကျွမ်းကျင်ပညာရှင်တွေက အောက်ဖော်ပြပါ နည်းလမ်းသုံးသွယ်ကို အကြံပြုကြတယ်။

၁။ ကိုယ်လက်လှုပ်ရှားလေ့ ကျင့်ခန်းကို စမတ်ကျကျလုပ်ပါ

မိမိတို့ရဲ့ ပေါင်တံနဲ့တင်ပါးတွေနဲ့ပတ်သက်ပြီး စိတ်ပူတဲ့လူတွေဟာ အဲဒီနေရာတွေမှာ ပြင်းပြင်း ထန်ထန်လုပ်ပေးရင် ပြဿနာဖြေရှင်းနိုင်မယ်လို့ ထင်ကြတယ်။ ဒီလိုစဉ်းစားတာက ဒဏ်ရာတွေရဖို့ ဖြစ်လာနိုင်ကြောင်း “နက်ချ်ဗီးလ်” မှာ ကုထုံးဆိုင်ရာလေ့ကျင့်ခန်းကို သင်ကြားပေးတဲ့ “ဒေါက်တာမေရီ ပူးလ်လစ်ဆွာ့ချ်”က ဆိုတယ်။ ကိုယ်အလေးချိန်ကျရင် ခန္ဓာကိုယ်တစ်ခုလုံးမှာ ကိုယ်အလေးချိန်ကျပါတယ်။ ခြေထောက်တွေကို ထိရောက်တဲ့ လေ့ကျင့်ခန်းကို ရွေးချယ်တာက ပိုကောင်းလိမ့်မယ်။ ပေါင်တံတွေနဲ့ တင်ပါးတွေမှာရှိတဲ့ ကြွက်သားတွေကို ကြီးထွားတဲ့ ကြွက်သားအုပ်စုတွေကို လေ့ကျင့်ခြင်းဟာ ကယ်လိုရီအလုံးစုံကို ပိုလောင်ကျွမ်းစေတယ်။

ပေါင်တံနဲ့ တင်ပါးတွေရဲ့ ကြွက်သားတွေကို ထိရောက်တဲ့ အကောင်းဆုံး ကိုယ်လက်လှုပ်ရှား လေ့ကျင့်ခန်းတွေဟာ လမ်းလျှောက်ခြင်း၊ စက်ဘီးစီးခြင်း၊ (ရပ်နေတဲ့စက်ဘီး ဒါမှမဟုတ် အိမ်ပြင်)၊ နှင်းလျှောစီးခြင်းနဲ့ လှေခါးတက်ခြင်းတို့ဖြစ်တယ်။

ရွရွပြေးခြင်း ဒါမှမဟုတ် ပြေးခြင်းဟာလည်း အဆီအလုံးစုံ လောင်ကျွမ်းမှုအတွက် ကောင်းတယ်။ ဒါပေမဲ့ ပေါင်တံတုတ်တဲ့ လူတွေအတွက် ကောင်းတဲ့နည်းလမ်းမဟုတ်ပါ။ ပြေးဖို့ အခက်အခဲရှိပြီး သက်တောင့်သက်သာမရှိလို့ ၎င်းတု့ိ ကြိုက်မှာမဟုတ်ကြောင်း “ရော့ချက်စတာ”ရှိ Mayo Clinic မှ ဒေါက်တာသောမတ်ဒီရစ်တိုက ဆိုတယ်။ သိပ်မဝေးတဲ့ အကွားအဝေးတစ်ခုမှာပြေးပြီး နောက်တစ်ခုမှာ လမ်းလျှောက်ပါက တဖြည်းဖြည်း ခွန်အားရှိလာတယ်။ လမ်းလျှောက်တာ၊ ပြေးတာကို တစ်လှည့်စီပြုလုပ်ဖို့ “ရစ်ဇို”က အကြံပြုပါတယ်။

တစ်ကြိမ်လျှင် မိနစ် ၂ဝ မှ ၃ဝ အထိ၊ တစ်ပတ်လျှင် ၃ ကြိမ်မှ ၅ ကြိမ်ထိ လေ့ကျင့်ခန်းပြုလုပ်ရင် အဆီတွေဟာ ပိုလောင်ကျွမ်းပြီး ပေါင်တံများကျစ်လျစ်လာမည်ဟု ကျွမ်းကျင်သူတွေက အကြံပြုသည်။ လမ်းလျှောက်ခြင်း ဒါမှမဟုတ် ပန်းစိုက်ပြီး ပန်းခြံပျိုးထောင်ခြင်းကဲ့သို့သော နေ့စဉ်ကာယလှုပ်ရှားမှုကို အကြံပြုကြတယ်။

၂။ အားဖြည့်ပေးပါ

ပေါင်တံတွေကို အားဖြည့်ပေးခြင်းက ကြွက်သားတွေကို တောင့်တင်းကြံ့ခိုင်ပြီး တင်းမာစေတယ်။ ပေါင်တံတွေဟာ ကျစ်လျစ်သန်မာလာပြီး ပုံစံကျလာတယ်။ ခြေထောက်မတင်တဲ့ လှုပ်ရှားမှုက ပေါင်တံကို အားဖြည့်တဲ့ အကောင်းဆုံးနည်းဖြစ်ပါတယ်။ လက်နဲ့ ဒူးတွေကို ကြမ်းပေါ်ချပြီး ခြေထောက်တစ်ဖက်ကို နောက်သို့ဆန့်ထုတ်ပြီး ကြမ်းပြင်နဲ့အပြိုင်ရှိပါစေ။ ပြန်ချပြီး၊ နောက်တစ်ဖက်ကို ဆန့်ပါ။ တစ်ဖက်ကို ဆယ်ကြိမ်စီပြုလုပ်ပါ။

ခန္ဓာကိုယ်ကို တစ်ဘက်စောင်းပြီး ခြေထောက်မတင်ခြင်းများကို ပြုလုပ်နိုင်ပါတယ်။ ခြေထောက်ကို ဖြောင့်ဖြောင့်နှင့် ကြမ်းပေါ်ရှိ ခြေထောက်နှင့် ဝေးရာသို့ မတင်လိုက်ပြီး ခန္ဓာကိုယ်နှင့် ၄၅ ဒီဂရီရှိနေပါစေ။ ရှေ့သို့ ခြေလှမ်းကျဲကျဲလှမ်းခြင်းဖြင့် သင့်နောက်က ဒူးဟာ မြေပြင်မှ ခြောက်လက်မခန့်ရှိပါစေ။ နောက်ပြန်ဆုတ်ပါ။ ခြေတစ်ဖက်နဲ့ ယင်းသို့ ဆယ်ကြိမ်ပြုလုပ်ပါ။ နောက်တစ်ဖက်ဖြင့် ဒီအတိုင်း ဆယ်ကြိမ်ပြုလုပ်ပါ။ ဒီပုံသေလှုပ်ရှားမှုက သက်သာရင် လက်တွေမှာ အလေးကိုင်ပြီး လေ့ကျင့်လို့ရပါတယ်။

၃။ နေ့စဉ်စားတဲ့အစားအစာ

ဝပြီး ပေါင်တံတုတ်တဲ့ အမျိုးသမီးတစ်ဦးဟာ တစ်နေ့မှာ ငါးမိုင်ပြေးပြီး ကယ်လိုရီတွေကို လျှော့စားတဲ့အခါမှာ ကိုယ်အလေးချိန် ကျလာတာကို တွေ့ရတယ်။ ၎င်းရဲ့ လက်မောင်း၊ မျက်နှာ အစရှိတဲ့နေရာတိုင်းမှာ ကိုယ်အလေးချိန်လျော့သွားပေမယ့် ပေါင်တံတွေမှာ လျော့မသွားပါ။ စက်ဘီးစီးတဲ့လှုပ်ရှားမှုကို လုပ်ပေမယ့် ကိုယ်လိုချင်တဲ့ ကိုယ်အလေးချိန်ရသော်လည်း ပေါင်တံတွေက ပြဿနာဖြစ်နေဆဲပါ။

၎င်းဟာ ကိုယ်လက်လှုပ်ရှားမှုတွေကိုသာ အာရုံစိုက်မိပြီး ကိုယ်နေ့စဉ်စားတဲ့ အစားအစာကို ဂရုမစိုက်မိဘဲ အဆီများတဲ့ အစားအစာတွေကို စားမိနေတယ်။ စားတဲ့ကယ်လိုရီက နည်းသော်လည်း အစားအစာမှာ အဆီပါဝင်မှုက လွန်ကဲနေတယ်။ ဒါကြောင့် အစားအစာကို မှန်ကန်အောင်ပြင်လိုက်တဲ့အခါမှာ ၎င်းရဲ့ ပေါင်တံတွေဟာ သွယ်လျလာတယ်။ ကိုယ်လက်လှုပ်ရှား လေ့ကျင့်ခန်းနဲ့ အဆီနည်းတဲ့ အစားအစာကိုပေါင်းပြီး ကာဗိုဟိုက်ဒရိတ်မှ အများအပြားရတဲ့ ကယ်လိုရီလည်း ပါဝင်ပါစေ။ ဝပြီး ပေါင်တံတုတ်တဲ့ အမျိုးသမီးအတွက် အီတလီခေါက်ဆွဲခြောက်၊ ကောက်နှံ၊ ဟင်းသီးဟင်းရွက်နဲ့သစ်သီးတွေကိုသာ စားသင့်တယ်။ နီတဲ့အသား(အမဲသား၊ သိုးသား၊ ဝက်သား)နဲ့ အဆီများတဲ့ သရေစာတွေကို ရှောင်တယ်လို့ ၎င်းကဆိုတယ်။

ချင့်ချိန်စားတဲ့အစားအစာနဲ့ ကိုယ်လက်လှုပ်ရှားလေ့ကျင့်ခန်းကို နှစ်ခုစလုံးလုပ်လို့ရတဲ့ရလဒ်နဲ့ လေ့ကျင့်ခန်းတစ်ခုတည်းလုပ်လို့ ရတဲ့ရလဒ်ကို နှိုင်းယှဉ်ကြည့်လျှင် အချိုးက ငါးအချိုးတစ်ဖြစ်ကြောင်း ကျွမ်းကျင်သူများကဆိုသည်။ ဒါကြောင့် ပေါင်တံတွေသွယ်လျလိုရင် လေ့ကျင့်ခန်းအပြင် ချင့်ချိန်စားရတဲ့ အစားအစာတွေကို ရွေးချယ်စားရမှာဖြစ်တယ်။

နှင်းအေးဝေ

Health Care