သူတို့ပြောသော ထောင်အတွင်းမှ ပရလောကသားမျာ: ဇော်သက်ထွေး

0
8750

အင်းစိန်ထောင်မှ ဂန္ထ၀င်စိမ်း – ( ၅ )
 

ကြိုးမပေးခင် ထူးထူးဆန်းဆန်း တောင်းဆိုသွားတဲ့ နောက်ထပ် ကြိုးသမား တစ်ယောက်လည်း ရှိခဲ့ပါတယ်။ သူ့ကို အားလုံးက နာမည် အရင်း မခေါ်ဘဲ “တာဝ” လို့ပဲ ခေါ် ပါတယ်။

တာဝဆိုတာ သန်လျင်ဘက်က ရန်ကုန်အရှေ့ပိုင်း တက္ကသိုလ် ဖွင့်လှစ်ထားတဲ့ နေရာ ဖြစ်ပါတယ်။ ၁၉၈၀ ကျော်လောက်က အထက်တန်း ကျောင်းသူလေး တစ်ယောက်ကို ရည်းစားစကား လိုက်ပြောတာ လက်မခံဘဲ ငြင်းပယ်တဲ့ အတွက် ရေစင်အောက်နားမှာတွေ့တဲ့ ၀ါးရင်းတုတ်ကို ယူပြီး ကောင်မလေးကို မသေမချင်း ရိုက်သတ်ခဲ့လို့ သေဒဏ် အပြစ်ပေးခြင်း ခံခဲ့ရတာ ဖြစ်ပါတယ်။

သူဟာ အင်းစိန်ထောင် ကြိုးစင်မှာ နောက်ဆုံး ကြိုးပေးခံရတဲ့ ကြိုးသမားလို့လည်း ပြောကြပါတယ်။ တချို့ကလည်း နောက်ဆုံးကြိုးပေးခံရတဲ့ သူဟာ ဓားပြတိုက်ပြီး လူသတ်၊ မုဒိမ်းကျင့်ခဲ့တဲ့ ဓားပြ “သာနု” လို့လည်း ပြောကြပါတယ်။ ဘာပဲပြောပြော တာဝကတော့ သူ့ကို ကြိုးမပေးခင် “အချစ်ရှုံးသမား ဒဿဂီရိ” သီချင်းကို ဖွင့်ပြဖို့ တောင်းဆိုခဲ့တာပါပဲ။ ပြီးတော့လည်း ကြိုးစင်ပေါ်ကို အေးအေးဆေးဆေး တက်သွားတယ်လို့ သိရပါတယ်။

တာဝကို ကြိုးပေးခဲ့တဲ့ သူဟာ ထောင်မှူး ဦးမောင်မောင်ကြီးလို့ သိရပြီး အဲဒီအချိန်က ကြိုးစင်ဒေါက်ဖြုတ်ခ ၂၅ ကျပ် နိုင်ငံတော်က ချီးမြှင့်ခဲ့တယ်လို့လည်း သိရပါတယ်။

ကြိုးသမားတွေကို ကြိုးပေးပြီးတဲ့နောက် အသုံးပြုခဲ့တဲ့ကြိုးကို သေဆုံးသူရဲ့ ထောင်ဝင်နံပါတ် ချိတ်ပြီး စနစ်တကျ ခေါက်သိမ်းကာ အလုပ်ကြီးဝင်းထဲက ဗီရိုမှာ သိမ်းဆည်းထားခဲ့တယ်လို့ ဆိုပါတယ်။ အခုတော့ ရှိမရှိ မသိရ တော့ပါဘူး။ အတိတ်ဇာတ်လမ်းတွေ အများကြီးရှိတဲ့ အင်းစိန်ထောင်က ကြိုးစင်အကြောင်းနဲ့ ခြောက်လန့်ခဲ့တဲ့ အဖြစ်အပျက်တွေ ရေးရင် ကုန်မှာ မဟုတ်ပါဘူး။ အမှန်တကယ် ရေးချင်တာက အင်းစိန်ထောင်က ဂန္ထ၀င်စိမ်း ဇာတ်လမ်းကို ရေးချင်တာဖြစ်ပါ တယ်။ ဒါကြောင့် ကြိုးတိုက်နဲ့ ကြိုး စင်အကြောင်းကို ဒီမှာပဲ နိဂုံးချုပ်ပါ ရစေ။

ဂန္ထ၀င်စိမ်း ဆိုတာကတော့ အဆိုတော် ဇော်ဝင်းထွဋ်ရဲ့ သီချင်းအမည်ဖြစ်ပါတယ်။ ဒီဇာတ်လမ်းရဲ့ အဖြစ်အပျက်အစကို ပြောရရင် ကျွန်တော့်ကို စစ်ခုံရုံးက အရေးပေါ် စီမံချက် အက်ဥပဒေ ပုဒ်မ ၅ ညနဲ့ ထောင်ဒဏ် ငါးနှစ် အပြစ်ပေးလိုက်ရာက စပါတယ်။ အချုပ်သားဘ၀က အစောပိုင်း ဖော်ပြခဲ့သလို ကြိုးတိုက်လို့ ခေါ်တဲ့ (၂) တိုက်မှာ နေထိုင်ခဲ့ရပေမယ့် ထောင်ကျ အကျဉ်းသား ဖြစ်သွားတဲ့နောက် အဆောင်ကို ရောက်သွားပါတယ်။

အဆောင်မှာ ကိုယ်လိုသူလို နိုင်ငံရေး အကျဉ်းသား တချို့နဲ့ ဆုံတွေ့ခဲ့ပါတယ်။ သူတို့တွေကတော့ သာကေတ NLD က သံချပ်အဖွဲ့တွေနဲ့ သန်လျင်သံချပ် အဖွဲ့တွေပါပဲ။ အဆောင်မှာ နိုင်ငံရေး အကျဉ်းသားတွေဟာ အခြား အကျဉ်းသားတွေနဲ့ မရောထွေးဘဲ စုစုဝေးဝေး နေထိုင်ကြတယ်။ အချင်းချင်း စုမိတော့မှ တိုက်ထဲမှာနေရသလို စိတ်ညစ်ညူး မနေတော့ဘဲ အတော် ပေါ့ပေါ့ပါးပါး ဖြစ်သွားတယ်။

အပြင်မှာလည်း လူဖမ်းပွဲကြီး စနေတော့ ထောင်ထဲကို နေ့တိုင်း နိုင်ငံရေးသမားတွေ တဖွဲဖွဲ ၀င်လာတယ်။ ဒါကြောင့် ထောင်အာဏာပိုင်တွေက ထောင်ကျပြီးသား နိုင်ငံရေးသမားတွေကို လူစုခွဲတဲ့အနေနဲ့ တခြားထောင်တွေ ရွှေ့ပစ်တယ်။ အရင်ဆုံး ရွှေ့တဲ့ ထောင်ကတော့ အင်းစိန်ထောင်နဲ့ အနီးဆုံး သာယာဝတီ ထောင်ပါပဲ။

သာယာဝတီထောင်ကို လူအတော်များများ ပြောင်းရွှေ့သွားတော့ အဆောင်မှာ ခြောက်သွေ့ပြီး ကျန်ရစ်ခဲ့တယ်။ သိပ်မကြာခင်မှာပဲ အချုပ်ကျနေတဲ့ ကျောင်းသားတွေ ထောင်ကျသွားပြီး အဆောင်ကို အုံနဲ့ကျင်းနဲ့ ရောက်လာကြပြန်တယ်။ ဒီလိုနဲ့ လူစုမိလိုက်၊ လူပြန်ချဲ လိုက်၊ သံသရာလည်နေတယ်။

ထောင်က နားလည် သဘောပေါက်သွားလို့ နိုင်/ကျဉ်းတွေကို အရင်လို စုမထားတော့ဘူး။ ကြို တင် လူစုခွဲတဲ့ အနေနဲ့ တခြားအဆောင်တွေနဲ့ တိုက်တွေကို ခွဲခွဲပို့ပစ်လိုက်တယ်။ ထောင်ရဲ့စနစ်က တစ်နေရာကို ပြောင်းရွှေ့ပြီး တစ်လအကြာမှာပဲ တခြားတစ်နေရာကို ပြောင်းရွှေ့ရတာပါ။ သဘောကတော့ တစ်နေရာတည်းမှာ အကြာကြီးထားရင် နိုင်ငံရေး အကျဉ်းသားတွေက ရိုးရိုးအကျဉ်းသားတွေကို စည်းရုံးပြီး ထောင်ဆူအောင် လုပ်မှာစိုးလို့လို့ သိရပါတယ်။

အဲဒီလိုနဲ့ ကျွန်တော်လည်း ဟိုအဆောင် ရောက်လိုက်၊ ဒီတိုက်ရောက်လိုက်နဲ့ ယောက်ယက်ခတ်နေပါတယ်။ နောက်ဆုံးတော့ ရွှေ့တဲ့နေရာတွေ အကုန်နေဖူးသွားလို့ ကျွန်တော့်ကို ဘယ်နေရာထားရမှန်း မသိတော့ဘူး။ မိန်းဂျေးလ် ထောင်မှူးကြီးက ထူးထူးဆန်းဆန်း ကျွန်တော့်ကို သေချာကြည့်ပြီး “ဒီ ကောင့်ကို (၅) တိုက်၊ အခန်း ၂၂ ပို့လိုက်” လို့ အမိန့်ပေးလိုက်တဲ့အခါ ကျောထဲမှာ စိမ့်သွားတယ်။

ထားစရာ နေရာရှားလို့ ကြိုးသမားတွေ မသတ်ခင် နောက်ဆုံးနေရတဲ့အခန်းကိုမှ ပို့ရတယ်ဆိုပြီး ချောက်ချားသွားတယ်။ ဒါဟာ သဘောရိုးတော့ မဖြစ်နိုင်ဘူး။ အပြင်က ထောက်လှမ်းရေးတွေက လှမ်းပြီး ဒုက္ခပေးသလား မသိဘူးဆိုပြီး စိတ်ထဲမှာ စိုးရိမ်သောကတွေ ဖြစ်လာပါတယ်။ တာဝန်ကျ ၀ါဒါတစ်ယောက်က ကျွန်တော့်ကို ခေါင်းစွပ်အုပ်ပြီး (၅) တိုက်၊ အခန်း ၂၂ ကို လိုက်ပို့တယ်။

အခန်းဝ ရောက်မှ ခေါင်းစွပ်ကို ခွာလိုက်တယ်။ ကျွန်တော် စတွေ့ရတဲ့ မြင်ကွင်းကတော့ အခန်း ၂၂ ထဲကနေ နှုတ်ခမ်းမွေးနဲ့ လူကြီးတစ်ယောက်က ကျွန်တော့်ကို ပြုံးပြုံးကြီး ကြည့်နေတာပဲ။ ကျွန်တော် အခန်းထဲရောက်ပြီးတဲ့အခါ သူ့ကို မ၀ံ့မရဲနဲ့ မိတ်ဆက်လိုက်တယ်။

“အစ်ကိုကြီးက ဘယ်သူလဲ” 
“ဘာမှမစိုးရိမ်ပါနဲ့ကွာ။ ငါလည်း နိုင်ငံရေးအမှုနဲ့ ထောင်ကျနေတဲ့ ရှေ့နေ တစ်ယောက်ပါပဲ”

ကျွန်တော်တုိ့နှစ်ယောက် အပြန်အလှန် မိတ်ဆက်နေစဉ်မှာပဲ ထောင်ဝန်ထမ်း တစ်ယောက်က ခေါင်းစွပ်အုပ်ထားတဲ့ လူတစ်ယောက်ကို ထပ်ခေါ်လာတယ်။ ခေါင်းစွပ် ခွာလိုက်တော့ အသားဖြူဖြူ၊ ဒေါင်ကောင်းကောင်း ချာတိတ်လေးတစ်ယောက် ဖြစ်နေတယ်။ အခန်းထဲရောက်မှ အကျိုး အကြောင်းမေးကြည့်တော့ ပဲခူး ကျောင်းသားတစ်ယောက် ဖြစ်နေတယ်။

သူက တပ်ဦးကိစ္စနဲ့နွှယ်ပြီး ထောင်ကျလာတာပါ။ ဒီလိုနဲ့ (၅)တိုက်၊ အခန်း ၂၂ မှာ ကျွန်တော်ရယ်၊ ရှေ့နေကြီးရယ်၊ ပဲခူးကျောင်းသားရယ် သုံးယောက် ဖြစ်သွားတယ်။ တစ်ယောက် အမှုကို တစ်ယောက် မေးမြန်းရင်း အချိန်တိုတို အတွင်းမှာ နွေးနွေးထွေးထွေးနဲ့ ခင်မင်သွားကြတယ်။ အပြင်မှာတော့ ကျွန် တော်တို့လူမျိုးတွေဟာ အဖွဲ့အစည်းစိတ်၊ ဂိုဏ်းဂဃစိတ် အရမ်းကြီးတယ်။

ကျောင်းသားတွေထဲမှာ ဗကသ၊ မကသ ရှိတယ်။ ရန်ကုန်တက္ကသိုလ် ကျောင်းသားတွေထဲမှာလည်း ရကသဆိုတာ ရှိတယ်။ အခြေခံ ပညာအထက်တန်း ကျောင်းသားတွေဟာလည်း အကသဆိုပြီး အဖွဲ့ရှိတယ်။ တပ်ဦးတွေ ရှိတယ်။ တကယ့်တကယ် ထောင်ကျ ပြီး အတူနေကြရတော့ ဗတွေ၊ မတွေ၊ တပ်ဦးတွေ မရှိတော့ပါဘူး။ တကယ့် ညီအစ်ကိုရင်းတွေလို ဖြစ်သွားပြီ။ နိုင်ငံရေး အကျဉ်းသားဆိုတဲ့ အလံတစ်ခုပဲ ရှိတော့တယ်။

ကျွန်တော်တို့သုံးယောက်စလုံးဟာ တစ်လတစ်ကြိမ် သံသရာလည်နေရာကနေ နောက်ဆုံး ဘယ်သူမှ မနေချင်တဲ့ ၅ တိုက်၊ အခန်း ၂၂ ကို ရောက်လာရတာ ဖြစ်ပါတယ်။ အားလုံးသိတဲ့အတိုင်း အခန်း ၂၂ ဆိုတာ ကြိုးသမားတွေကို မသတ်ခင် သရဏဂုံ တင်ပေးရတဲ့ အခန်းဖြစ်နေတော့ ကျောချမ်းတာပေါ့ဗျာ။ ဒါပေမဲ့ ကိုယ်နဲ့ အတူနေရတဲ့ ရှေ့နေကြီးကို ကြည့်လိုက်တော့ အတော်အားရှိသွားတယ်။

ရှေ့နေကြီးက ဥပုသ်စောင့်တာ ၁၇ နှစ်ရှိပြီလို့ သိရတယ်။ နေ့ည မခွဲခြားနိုင်တဲ့ စစ်ကြောရေး အခန်းမှာတောင် ရှေ့နေကြီးက ဥပုသ်ရအောင် စောင့်ခဲ့တာဖြစ်ပါတယ်။ စစ်ကြောရေးဆိုတာ အခန်းတစ်ခုထဲမှာ မျက်လုံးကို အကာတစ်ခုနဲ့ပိတ်ပြီး နေရတာ ဖြစ်လို့ နေ့နဲ့ည ခွဲခြားဖို့ခက်သွားပါတယ်။ နိုင်ငံရေး အကျဉ်းသားတစ်ယောက်ကို စစ်ကြောနေစဉ်မှာ မှန်ကာထားတာကြောင့် အပြင်ဘက်က အထဲကို အားလုံးမြင်နိုင်ပေမယ့် အထဲကတော့ အပြင်ကို မမြင်နိုင်ပါဘူး။

ငှက်သံ၊ ကားသံတွေကို ကြည့်ပြီး နေ့ ညခွဲရပါတယ်။ ရှေ့နေကြီးက နေ့ည သူ့ဟာသူခွဲပြီး ဥပုသ်စောင့်ပါတယ်။ ထောက်လှမ်းရေးက ဥပုသ်စောင့် မှန်းသိလို့ မနက်ပိုင်း ထမင်းမကျွေးဘဲ ညမှ လာကျွေးတာမျိုးတွေ ရှိပါတယ်။ ဒါပေမဲ့ သူက သတ်မှတ်သိနဲ့ ဆင်ခြင်ပြီး ထမင်းမစားဘဲ ထိန်းနိုင်ခဲ့တယ်လို့ ဆိုပါတယ်။ နောက်ဆုံးတော့ ထောက်လှမ်းရေးက အမှန်တကယ် ဘာသာရေးသမားမှန်း သိသွားလို့ သေချာအချိန် ပြောပြီး ကျွေးခဲ့တယ်လို့ ဆိုပါတယ်။

ကျွန်တော်တို့သုံးယောက် အခန်း ၂၂ မှာ ရေချိုးချချိန်၊ လမ်းလျှောက်ချိန်က လွဲပြီး အခန်းထဲမှာပဲ နေရတယ်။ တခြား အခန်းက လူတွေနဲ့ စကားသွားပြောရင် ရေချိုးပိတ်၊ လမ်းလျှောက်ပိတ်တယ်။ ဒီလိုနဲ့ တစ်ယောက်အကြောင်း တစ်ယောက် ပြောဖြစ်ကြတာပေါ့။ ပဲခူးကျောင်းသားက ပဲခူးမှာ အဖမ်းခံရတာ ဆိုပေမယ့် ကြို့ပင်ကောက်ဇာတိလို့ သိရတယ်။ သူက လူငယ်ပေမယ့် စကားပြောတဲ့အခါမှာ အတော် သိုသိုသိပ်သိပ် နိုင်တဲ့သူဖြစ်ပါတယ်။

ကျွန်တော်က ဟိုစပ်စပ် ဒီစပ်စပ်သမား ဖြစ်တာကြောင့် တစ်ညမှာ သရဲတစ္ဆေတွေ အကြောင်း၊ နာနာဘာဝတွေအကြောင်း ပြောဖြစ်ကြတယ်။ ပြောရင်းနဲ့ ပဲခူးကျောင်းသားက ကြို့ပင်ကောက်ဇာတိဆိုတော့ အဲဒီအချိန်က နာမည်ကြီးနေတဲ့ ကြို့ပင်ကောက်က “လေချွန်နတ်” ကို သိလားလို့ ကျွန်တော်မေးလိုက်တော့ သူ ရုတ်တရက် တုန်လှုပ်သွားတယ်။ နောက်တော့မှ မဖြေချင့် ဖြေချင်နဲ့ ဖြေတယ်။

“အဲဒီ လေချွန်နတ်က ကျွန်တော့် အဘွားတော်ပါတယ်”

သူ့စကားဆုံးတော့ ကျွန်တော်မျက်လုံး ပြူးသွားတယ်။ ဘာလို့လဲဆိုတော့ ဒီ လေချွန်နတ်ဟာ ကျွန်တော့်ဘ၀မှာ အရေးကြီးတဲ့ အမှတ်ရစရာတွေကို ဖြစ်စေခဲ့လို့ပါ။ နောက်တော့ ပဲခူးကျောင်းသားရဲ့အဘွား လေချွန်နတ်နဲ့ ကျွန်တော်တို့ မိသားစု ပတ်သက်ခဲ့ပုံကို ပြောပြလိုက်ရတယ်။

ပြောရရင် ကျွန်တော် ရှစ်တန်း ကျောင်းသားဘ၀မှာ ကျွန်တော့်အဖေ ဆုံးသွားတယ်။ အဖေဆုံးသွားပြီး ခြောက်လလောက် အကြာမှာတော့ အိမ်ကို စာတစ်စောင် ရောက်လာတယ်။ စာထဲမှာ အဖေ့ရဲ့ လုပ်ဖော်ကိုင်ဖက်ဟောင်းတစ်ယောက်က မော်လမြိုင်မှာ စပ်တူလုပ်ခဲ့တဲ့ စီးပွားရေး လုပ်ငန်းတစ်ခုက အဖေ့ရဲ့ရှယ်ယာတွေ ရဖို့ရှိလို့ လာခဲ့ပါလို့ခေါ်တဲ့ စာတစ်စောင် ဖြစ်နေတယ်။

ဒီစာကိုဖတ်ပြီး အိမ်သားထဲမှာ သဘောထား ကွဲကုန်တယ်။ အမေနဲ့ အစ်မတွေက ဒီစာဟာ လိမ်ပြီးခေါ်တယ်လို့ ထင်တယ်။ အစ်ကိုတွေကတော့ အဖေ့ရဲ့ ရသင့်ရထိုက်တဲ့ ဝေစုကို သွားယူသင့်တယ်လို့ ပြောကြတယ်။ နောက်ဆုံး အစ်မကြီးက အဖေလည်း မော်လမြိုင်မှာ ကုန်ကူးခဲ့ဖူးတော့ ဖြစ်နိုင်လောက်တယ်။ လေချွန် နတ်မေးပြီးမှ သွားရင် မကောင်းဘူးလားလို့ အကြံပေးတယ်။ မိသားစုအားလုံးက သဘောတူသွားကြတယ်။

အဲဒီအချိန်က ကြို့ပင်ကောက်က လေချွန်နတ်ကလည်း အရမ်းနာမည်ကြီးနေတယ်လေ။ သေဆုံးတဲ့သူတွေကို ခေါ်ပြီး မေးနိုင်တဲ့အထိ အစွမ်းအစရှိတယ်။ ဒီတော့ တစ်မိသားစုလုံး လေချွန်နတ် သွားမေးကြတယ်။

ကြို့ပင်ကောက် ရောက်တော့ လေချွန်နတ် မေးတဲ့သူတွေ အများကြီးနဲ့ တိုးတော့တာပါပဲ။ လေချွန် နတ်မေးတဲ့ အဘွားက အမည်းရောင် ကန့်လန့်ကာကြီးကာပြီး အဲ့ဒီရှေ့မှာ ပွဲတွေထိုးထားတယ်။ လေချွန်နတ် မေးမယ့်သူတွေ က သီးခြားအဆောင်တစ်ခုမှာ နေရတယ်။ နာမည်ခေါ်မှ အဘွားကြီးရှိတဲ့ အဆောင်ကို သွားကြရတယ်။ မေးမယ့်သူ လာမှ အဘွားကြီးက ထွက်လာတယ်။

အဘွားကြီးက ရုပ်အတော်ဆိုးလို့ သူ့ကိုကြည့်ရင်းနဲ့တောင် ကြက်သီးမွေးညင်းတွေ ထသွားတယ်။ သူက အားလုံးကို ထိုင်ခိုင်းထားတယ်။ ပြီးတော့ အသံမထွက်ဘဲ ရွတ်ဖတ်နေတယ်။ သိပ်မကြာပါဘူး။ လေချွန်သံ သဲ့သဲ့လေးကို ကြားလိုက်ရတယ်။ လေချွန်သံကလည်း လူစကားပြောသံနဲ့ နည်းနည်းတူတယ်။

အဘွားကြီးက ရောက်လာတာကို အသိအမှတ်ပြုတဲ့အနေနဲ့ ခေါင်းတစ်ချက် ညိတ်ပြပြီး ထိုင်နေတဲ့ ကျွန်တော့်အစ်ကို ကြီးကို မေးတစ်ချက် ဆတ်လိုက်ပြီး “ဒါ ဘယ်သူလဲ” လို့ လှမ်းမေးတယ်။ ကန့်လန့်ကာအမည်း နေရာတစ်နေရာကနေ သားလို့ ပြန်ဖြေတယ်။ “နာမည်ပြော” လို့ ဆက်မေးတော့ “မောင်မောင်လတ်” လို့ ဖြေတယ်။ ဒီမှာတင် အဘွားကြီးက အစ်ကို့ကို ကြည့်ပြီး “အဲဒါ မင်းအဖေပဲ” လို့ ပြော လိုက်တယ်။

လေချွန်နတ်မေးတဲ့ အချိန်မှာ လိုက်နာရတဲ့ စည်းကမ်းတွေ ရှိပါတယ်။ အဲဒီစည်းကမ်းတွေကတော့ ကိုယ့်ရဲ့ ကွယ်လွန်သွားတဲ့ မိသားစုဝင်လာရင် မငိုရဘူး။ ထမပြေးရဘူးဆိုတဲ့ စည်းကမ်း
ချက်တွေပါပဲ။

အချုပ်ပြောရရင်တော့ အဖေက မိသားစုတွေကို ကျွန်တော်တို့နေ တဲ့ ရပ်ကွက်ရဲ့ ကမ်းနားလမ်းက ညောင်ပင်ကြီးမှာ ရုက်္ခစိုး ဖြစ်နေတယ်လို့ ပြော တယ်။ နောက်ဆုံး မော်လမြိုင်က ငွေရေး ကြေးရေးကိစ္စအတွက် စာရောက်လာတယ်လို့ ပြောတော့

“ဒါ သက်သက်လိမ်တာ”လို့ ပြောတယ်။

လေချွန်နတ် ပြန်မထွက်ခင် ကျွန်တော့်ကို ကျောင်းမတက်ဘဲ သူ ရုက္ခစိုး လုပ်တဲ့ အပင်အောက်မှာ လာလာဆော့နေတယ်လို့ ပြောတော့ တော်တော် ကြက်သီးထသွားတယ်။ ဘာလို့လဲဆိုတော့ လေချွန်နတ်ပြောနေတာ အမှန်တွေဖြစ်လို့ပါပဲ။ ကျွန်တော်ပြောတာတွေ အားလုံးကို ပဲခူး ကျောင်းသားရော၊ ရှေ့နေကြီးရော ယုံကြည်လက်ခံတဲ့ပုံနဲ့ စူးစိုက်နားထောင်နေပါတယ်။ နှစ်တွေကြာတော့ အဖေလည်း ရုက္ခစိုးဘ၀က ကျွတ်သွားတယ်လို့ အမေက ပြောတယ်။

ရက်အနည်းငယ် အကြာမှာတော့ ကျွန်တော်တို့ အခန်း ၂၂ ကို နောက်ထပ် အခြေခံကျောင်းသားသမဂ္ဂ (အကသ) က ကျောင်းသား တစ်ယောက် ထပ်ရောက်လာ ပြန်ပါတယ်။ သူကတော့ စမ်းချောင်းသား ဖြစ်ပြီး အခြေခံကျောင်းသား သပိတ်မှာ ဦးဆောင်ခဲ့တဲ့အတွက် ထောင်ကျလာတာ ဖြစ်ပါတယ်။

နိုင်/ကျဉ်းတွေဟာ စာမဖတ်ရ၊ သီချင်းနားမထောင်ရတဲ့အတွက် အပြင်လောကနဲ့ အဆက်ပြတ်နေတဲ့ အခြေအနေ ဖြစ်ပါတယ်။ ဒါပေမဲ့ ကျွန်တော်တို့နောက် လေးငါးဆယ်လကြာမှ အထဲရောက်လာတဲ့ စမ်းချောင်းသားကြောင့် အခန်းဟာ ချက်ချင်းဆိုသလို စိုပြည်သွားပါတယ်။ သူက လူငယ်ဆိုတော့ နောက်ဆုံး နိုင်ငံရေး သတင်းလည်း ပြောပြတယ်။ သီချင်းတွေ ဆိုသလို သီချင်းအတော်များများကိုလည်း ရပါတယ်။

သူရောက်တဲ့ညကတော့ အပြင်မှာ ခေတ်စားနေတယ်ဆိုတဲ့ “ဂန္ထ၀င်စိမ်း” သီချင်းကို ဆိုပြတယ်။ စာသားကလည်း ထူးဆန်း၊ သံစဉ်ကလည်း ထူးဆန်းနေတော့ အတော် နားထောင်လို့ ကောင်းတယ်။ ဥပုသ်စောင့်တဲ့ ရှေ့နေကြီးတောင် သီချင်း သံစဉ်ထဲမှာ နစ်မျောနေတယ်။ ကျွန်တော်တို့ကလည်း အဆောင်မှာ တခြားအကျဉ်းသားတွေ လုပ်တဲ့အတိုင်း ပုံစံပန်းကန်ပြားကို မှောက် စိပ်ပုတီးတင်ပြီး ဒရမ်တီးတာပေါ့ဗျာ။

ဘေးအခန်းတွေကလည်း “ဂန္ထ၀င်စိမ်း” ကို အတော်အားပေးကြတယ်။ ဒီလိုနဲ့ ကျွန်တော်တို့ လေးယောက်ဟာ အင်းစိန်ထောင်ရဲ့ ကြောက်စရာ အကောင်းဆုံး (၅) တိုက်၊ အခန်း ၂၂ မှာနေရပေမယ့် ချစ်ချစ်ခင်ခင်၊ ပျော်ပျော်ရွှင်ရွှင်ပါပဲ။ အခန်း ၂၂ ကို ကြောက်ပေမယ့် ဘယ်လိုသရဲ တစ္ဆေကမှ မခြောက်လန့်ခဲ့သလို အရိပ် အယောင်တွေတောင် မပြခဲ့ပါဘူး။

ဒါပေမဲ့ တစ်နေ့တော့ ကျွန်တော်တို့ စည်းစည်းလုံးလုံး၊ ချစ်ချစ်ခင်ခင် ဖြစ်နေတာကို ဖျက်ဆီးမယ့် ပျက်စီးရာ ပျက်စီးကြောင်း တစ်ခု ပေါ်ပေါက်လာတယ်။ အဲ ဒါကတော့ တစ်ယောက်ကိုတစ်ယောက် စနေနောက်နေတာကနေ ဖြစ်လာတာပေါ့ ဗျာ။ ဘယ်ကစဖြစ်လဲဆိုတော့ စမ်းချောင်း (အကသ) ကျောင်းသားက ပရလောက အကြောင်း၊ ၀ိညာဉ်လောကအကြောင်း ညဘက် ပြောပြနေတဲ့ ပဲခူးကျောင်းသား ပြောတာတွေကို “မယုံဘူး” ဆိုတာက စတာပါပဲ။

သူ့ဘ၀မှာ တစ်ခါမှ သရဲခြောက်တာ၊ ကိုယ်ထင်ပြတာ မကြုံဖူးတဲ့အတွက် ဒါတွေဟာ ထင်ရာမြင်ရာ လျှောက်ပြောနေတာလို့ ထင်တယ်။ ပြီးတော့ ကျွန်တော်တို့ မကြာခဏ ကြားဖူးနေတဲ့ ကြံတောသင်္ချိုင်းထဲက ထွက်ထွက်လာတတ်တဲ့ မိန်းမတစ်ယောက်ဟာ ပြည်လမ်းမှာ ဆိုက်ကားငှား စီးပြီး ဆိုက်ကားသမားက ပိုက်ဆံတောင်းဖို့ လှည့်ကြည့်လိုက်ရင် ၀ါထိန်နေတဲ့ နနွင်းတွေနဲ့ ပါးစပ်ထဲကနေ ဖူးခနဲ မျက်နှာကို ထွေးထုတ်လိုက်တယ် ဆိုတဲ့အကြောင်းတွေဟာ လုပ်ကြံပုံပြင်တွေအဖြစ် ရိုးအီနေပြီလို့ သိရပါတယ်။

ဒါပေမဲ့ ပဲခူးကျောင်းသားက “တစ္ဆေတွေ ရှိတယ်ဆိုတာ မင်းမယုံဘူးလား” လို့ ပြန်မေးတော့ သူက “မယုံလို့၊ ခင်ဗျားကို စိန်ခေါ်နေတာပေါ့ဗျာ” လို့ ဖြေ တယ်။ ရှေ့နေကြီးကတော့ “ကောင်လေး၊ ပရလောကသားတွေ တကယ်ရှိတယ်။ သွားမလုပ်နဲ့” လို့ လှမ်းဟန့်သေးတယ်။ ဒါပေမဲ့ နှစ်ယောက်သား အရှိန်တက်နေတော့ တားလို့မရတော့ဘူး။

ပဲခူးကျောင်းသားက “အဲဒါဆို မင်းကို ငါခေါ်ပြမယ်။ အင်းစိန်ထောင်မှာ ကြာသပတေးနေ့တိုင်း အသားကျွေးတယ်။ ဒါပေမဲ့ ၀က်သားနဲ့ ဘဲဥဆိုတော့ သူတို့က မကြိုက်ဘူး။ အမဲသားကျွေးတဲ့ တစ်နေရာတော့ ရှိတယ်။ အဲဒါက ဒီထောင်ဆေးရုံပဲ။ ဆေးရုံစာဝေတဲ့ ငပျော့ဆီက အမဲသားတောင်းလို့ရတဲ့ တစ်နေ့ မင်းကို ငါခေါ်ပြမယ်” လို့ ပြော လိုက်တယ်။

သရဲတစ္ဆေ တကယ်ရှိမရှိ စိန်ခေါ်ပွဲ ကတော့စပြီ။

ဆက်လက်ဖော်ပြပါမည်

Tomorrow News Journal အတွဲ(၅)၊ အမှတ်(၁၁)