အစားအသောက်သက်သက်ဟာ ဝက်ခြံတွေကို ဖြစ်စေတာ၊ ဒါမှမဟုတ် ကာကွယ်နိုင်တာမျိုးတော့မဟုတ်ပါဘူး။ ဒါပေမယ့် ဝက်ခြံဖြစ်စေတဲ့နေရာမှာ မျိုးရိုးဗီဇ၊ လူနေမှုပုံစံ စတာတွေ ပါဝင်ပတ်သက်နေသလို အစားအသောက်တွေဟာလဲ အနည်းငယ်သက် ရောက်မှုရှိနိုင်တာဖြစ်ပါတယ်။

နို့

နို့အများကြီးသောက်လေလေ ဝက်ခြံဖြစ်နိုင်ခြေပိုများလေလေ ဖြစ်ပါတယ်။ အထူးသဖြင့် မလိုင်ထုတ်ပြီး နွားနို့တွေဖြစ်ပါတယ်။ နွားနို့မှာပါတဲ့ ဟော်မုန်းတွေကြောင့် ဝက်ခြံပိုဖြစ်သလားဆိုပြီး ယူဆချက်တွေရှိပါတယ်။

သကြားနဲ့ ကာဗိုဟိုက်ဒရိတ်တချို့

သင်စားသောက်တဲ့ အစားအသောက်တွေထဲမှာ ဆိုဒါ၊ ပေါင် မုန့်၊ ဆန်၊ ကိတ်မုန့် စတာတွေ များတယ်ဆိုရင် ဝက်ခြံဖြစ်နိုင်ခြေပိုများပါတယ်။ သကြားနဲ့ ကာဗိုဟိုက်ဒရိတ်တွေဟာ သွေးထဲကို အလွယ်တကူရောက်သွားပြီး အဲဒီသွေးထဲကသကြားဓာတ်ကို လျော့ကျစေဖို့ ကိုယ်ခန္ဓာကထုတ်လုပ်ပေးတဲ့ အင်ဆူလင်ဟာ အရေပြားမှာ အဆီထုတ်လုပ်ပေးတဲ့ အခြားသောဟော်မုန်းတွေကို ထွက်စေနိုင်လို့ ဖြစ်ပါတယ်။

ချောကလက်

ချောကလက်များများစားတဲ့ သူတွေမှာ ဝက်ခြံပိုထွက်နိုင်ခြေရှိတယ်ဆိုတဲ့ သုတေသနအချို့ရှိပါတယ်။ ဘာကြောင့် ဝက်ခြံပိုထွက်တယ်ဆိုတဲ့အချက်ကိုတော့ သေချာမသိကြသေးပါဘူး။ ချောကလက်မှာပါဝင်တဲ့ ကိုကိုးကြောင့်မဟုတ်ဘူးလို့တော့ ယူဆကြပါတယ်။ ဒါကြောင့် ချောကလက်လဲ စားချင်တယ်၊ ဝက်ခြံလဲ မထွက် စေချင်ဘူးဆိုရင် သကြားနဲ့ နို့ပါဝင်မှုနည်းတဲ့ ချောကလက်မျိုးကိုရွေးပြီး စားသုံးသင့်ပါတယ်။

အမျှင်များတဲ့ အစားအသောက်တွေ

အမျှင်များတဲ့ အစားအသောက်တွေဟာ ဝက်ခြံကို သက်သာစေတယ်လို့ဆိုပါတယ်။ ဘာကြောင့်ဆိုတဲ့ အကြောင်းရင်းကိုတော့ မသိကြပါဘူး။ အမျှင်များတဲ့အစားအသောက်တွေဟာ သွေးတွင်းသကြားဓာတ်ကို ထိန်းညှိပေးနိုင်တာကြောင့်လားလို့တော့ ယူဆကြတာရှိပါတယ်။ ကွေကာအုတ်၊ ပဲအမျိုးမျိုး၊ ပန်းသီးနဲ့ မုန်လာဥနီတွေဟာ အမျှင်များတဲ့ အစားအသောက်တွေဖြစ်ပါတယ်။

ဆယ်လမွန်ငါး

ဆယ်လမွန်ငါးမှာ အိုမီဂါ ၃ အဆီတွေ အများကြီးပါဝင်ပါတယ်။ ဒီအဆီတွေဟာ ကိုယ်ခန္ဓာအတွင်း ရောင်ယမ်းမှု ဖြစ်စဉ်ကို လျော့ကျစေနိုင်တဲ့အတွက် ဝက်ခြံထွက်တာကို လျော့နည်းစေနိုင်ပါတယ်။ ဒီအဆီတွေဟာ ဝက်ခြံဖြစ် စေတဲ့ အင်ဆူလင်လိုမျိုး ဓာတ်ပစ္စည်းထုတ်လုပ်မှုကိုလဲ လျော့ကျစေတယ်လို့ ယူဆကြပါတယ်။

အစေ့အဆန်တွေ

ဝက်ခြံထွက်နေတဲ့သူတွေမှာ ဗီတာမင်အီး၊ ဆီလီနီယမ်စတဲ့ ကိုယ်ခန္ဓာတွင်း ဓာတ်တိုးဖြစ်စဉ်ကို လျော့နည်းစေ တဲ့ဓာတ်ပစ္စည်းတွေ လျော့နည်းနေတတ်ပါတယ်။ အဲလမွန်၊ မြေပဲ၊ ဘရာဇီးလ်အစေ့ စတဲ့အစေ့အဆန်တွေမှာ ဒီဓာတ်တွေ အများကြီးပါဝင်ပါတယ်။ ဒီဓာတ်တိုးခြင်းကိုတားတဲ့ပစ္စည်းတွေဟာ ဆဲလ်တွေကို ထိခိုက်ခြင်းနဲ့ ပိုးဝင်ခြင်းကနေ ကာကွယ်ပေးနိုင်ပါတယ်။ ဒီဓာတ်တိုးခြင်းကိုတားတဲ့ပစ္စည်းတွေဟာ ဝက်ခြံတွေကို ပျောက်စေ နိုင်တယ်လို့ တိုက်ရိုက်သက်သေမရှိပေမယ့် ခန္ဓာကိုယ်အတွက်တော့ ကောင်းမွန်တဲ့ အာဟာရတွေဖြစ်ပါတယ်။ ဒါကြောင့် ဒီအစေ့အဆန်တွေကို စားသုံးသင့်ပါတယ်။

ကမာ/မုတ်ကောင်တွေ

ကမာ ဒါမှမဟုတ် မုတ်ကောင်တွေမှာ ဇင့်အများကြီးပါဝင်ပြီး ဒီဓာတ်ဟာ အရေပြားအတွက် အရေးပါပါတယ်။ ဝက်ခြံအမျိုး အစားတချို့ကိုဖြစ်စေတဲ့ ဘက်တီးရီးယားတွေကို ရှင်းလင်းဖို့ ဒီဓာတ်ဟာ အကူအညီပေးနိုင်တယ် လို့ဆိုပါတယ်။ ဇင့်ဟာ ကိုယ်ခန္ဓာမှာ ရောင်ယမ်းမှုဖြစ်စဉ်တွေကို လျော့ကျစေတယ်လို့လဲ ယူဆကြပါတယ်။ ဒါပေမယ့် ဇင့်ကို တရားလွန်တော့ မစားသုံးသင့်ပါဘူး။ အရွယ်ရောက်ပြီးတဲ့သူတစ်ယောက်ဟာ တစ်နေ့ကို ဇင့် ၄ဝ မီလီဂရမ်ထက် ပိုမစားသုံးသင့်ပါဘူး။

ကျောက်ပွင့်/ပင်လယ်ရေညှိ

ဆူရှီတွေ၊ ဆလတ်တွေ ဒါမှမဟုတ် ဆားငန်သရေစာတွေမှာ အိုင်အိုဒင်းဓာတ် အများကြီးပါဝင်နေတတ်ပါ တယ်။ ဒီကျောက်ပွင့် ပင်လယ်ရေညှိတွေဟာလဲ အဲဒီအိုင်အိုဒင်းပါဝင်မှုများတဲ့အရာတွေ ဖြစ်ပါတယ်။ အိုင်အိုဒင်းဟာ တခြားသော ငါးတွေ၊ နို့ထွက်ပစ္စည်းတွေနဲ့ အိုင်အိုဒင်းဆားတွေကနေလဲ ရရှိနိုင်ပါတယ်။ အိုင်အိုဒင်းဟာ သိုင်းရွိုက်ဂလင်း ပုံမှန်အလုပ်လုပ်ဖို့အတွက်လိုအပ်ပါတယ်။ အရွယ်ရောက်ပြီးတဲ့သူတစ် ယောက်အနေနဲ့ အိုင်အိုဒင်း ၁၅ဝ မိုက်ခရိုဂရမ်လောက် လိုအပ်ပါတယ်။ ကိုယ်ဝန်ဆောင်တွေနဲ့ နို့တိုက်မိခင် တွေမှာတော့ ပိုပြီးလိုအပ်နိုင်ပါတယ်။ ဒါပေမဲ့ အဲဒီလိုအပ်ချက်ထက်တော့ အများကြီးပိုပြီးမစားသုံးသင့်ပါဘူး။

ဆီပါတဲ့ အစားအသောက်တွေ

အဆီများတဲ့ အစားအသောက်တွေဟာ ဝက်ခြံတွေကို ဖြစ်စေတယ်၊ မဖြစ်စေဘူးဆိုတာကတော့ ငြင်းခုံနေကြဆဲ အကြောင်းအရာ တစ်ခုဖြစ်ပါတယ်။ ဆီတွေနဲ့ အကြာကြီး ကြော်လှော်နေရင်တော့ အဲဒီဆီတွေစင်တဲ့အတွက် အရေပြားမှာ ပြဿနာဖြစ်နိုင်တာကတော့ သေချာပါတယ်။

ဒေါက်တာကေ(အရေပြား)

Health Care